Árið 2018 starfaði Oddný á Landsspítalanum, Laugarás – meðferðarkjarna fyrir ungt fólk sem að sérhæfir sig í snemmíhlutun við byrjandi geðrofssjúkdómum þar sem áhersla var lögð á að meðhöndla geðrofseinkenni. Í vinnu sinni með þjónustuþegum, foreldrum þeirra og öðrum fjölskyldumeðlimum fékk hún reynslu af því að starfa eftir nálgunum fjölskyldumeðferðar og greiningu geðrænna vandkvæða.
Oddný hefur undanfarin ár starfað sem meðferðaraðili hjá Píeta samtökunum þar sem hún sinnir meðferðarvinnu einstaklinga í sjálfsskaða og sjálfsvígshættu og nýtir þar bæði hugræna atferlismeðferð og díalektríska atferlismeðferð (DAM). Einnig sinnir hún sorgarúrvinnslu fyrir aðstandendur einstaklinga sem hafa framið sjálfsvíg.
Á vormánuðum 2020 gekk Oddný til liðs við ráðgjafa og stuðningssetrið Bergið-Headspace en þar sinnir Oddný faglegri ráðgjöf fyrir ungt fólk frá 12 ára upp að 25 ára aldri. Ráðgjöfin felur í sér að hlusta á ungt fólk og meta vanda þess, veita ráðgjöf og ef þörf er á að hjálpa viðkomandi að fá meðferð eða annars konar aðstoð.
Oddný hefur einnig starfað hjá Stigamótum þar sem unnið er með hvers kyns kynferðisofbeldi sem á sér ýmsar birtingarmyndir og hefur oft alvarlegar og langvarandi afleiðingar. Vinnan felur í sér að gera einstaklinga meðvitaða um eigin styrk og hvernig hægt sé að nýta hann til þess að breyta eigin lífi. Einnig var hluti af verkefnum hennar fyrir Stigamót að sinna fræðslu og ráðgjöf til aðstandenda einstaklinga sem hafa orðið fyrir kynferðisofbeldi.
Oddný hefur rekið sína eigin meðferðarstofu frá árinu 2020 og sækir sér reglulega handleiðslu annara sérfræðinga.
